गटारात गुद्मरुन दोन कामगारांचा मृत्यू, प्रसिद्ध ठेकेदार रामहरी कातोरे व त्यांच्या मुलासह तिघांवर सदोष मनुष्यवधाचा गुन्हा दाखल.!

 

सार्वभौम (संगमनेर) :- 

                  संगमनेर शहरातील भूमीगत गटारी साफ करण्यासाठी ठेकेदारांनी केलेल्या हलगर्जीपणामुळे एक तरुण गुदमरून गटारीमध्येच पडला. म्हणुन त्याला वाचवण्यासाठी गेलेला दुसरा तरुण देखील गुदमरून जागीच मृत्युमुखी पडल्याची हृदयद्रावक घटना गुरुवार दि. 10 जुलै 2025 रोजी दुपारी 4 वाजण्याच्या दरम्यान शहरातील कोल्हेवाडी रोड परिसरात घडली. यामध्ये अतुल रतन पवार (वय 19,रा. संजयगांधी नगर, ता. संगमनेर), रियाज जावेद पिंजारी (वय 21, रा. मदिनानगर, ता. संगमनेर) असे मयत व्यक्तीचे नाव आहे. या घटनेनंतर नगरपालिकेला जाग आली. तेथील स्वछता निरीक्षक अमजद पठाण यांनी दिलेल्या फिर्यादीवरून आरोपी रामहरी मोहन कातोरे, निखील रामहरी कातोरे (रा. गोविंदनगर, ता. संगमनेर), मुश्ताक बशीर शेख (रा. शिवाजीनगर, ता. संगमनेर) यांच्यावर सदोष मनुष्यवदासह गंभीर कलमान्वये संगमनेर शहर पोलीस ठाण्यात गुन्हा दाखल करण्यात आला आहे. याचा पुढील तपास पोलीस करत आहे.

          याबाबत सविस्तर माहिती अशी की, अमजद बशीर पठाण यांनी दिलेल्या फिर्यादीत म्हटले आहे की, दि.12 जुलै 2021 आर. एम. कातोरे अँड कंपनी यांना भुमीगत गटार योजनेचे काम दिले आहे. मात्र, या भुमीगत गटारीचे काम पुर्ण झालेले नाही. त्यामुळे, ते अद्याप नगरपरिषदेकडे ठेकेदाराने हस्तांतरीत केलेले नाही. जो पर्यंत हे काम पूर्ण होत नाही. तोपर्यंत योजनेतील सर्व बाबींची देखभाल व दुरुस्तीची जबाबदारी ही करारनाम्यातील अट क्र.38 नुसार आर. एम. कातोरे अँड कंपनी रामहरी कातोरे व निखील कातोरे यांची आहे. भुमीगत गटारीचे बांधलेले चेंबरची देखभाल व दुरुस्ती ही देखील संपूर्ण जबाबदारी या ठेकेदारांचीच आहे.

        दरम्यान, संगमनेर नगरपरिष मार्फत आरोग्य विभागाकरीता संगमनेर शहरातील व उपनगरातील मोठ्या बंदिस्त गटारी साफ करण्यासाठी नगरपालिकेकडुन आदेश काढण्यात आला. हे काम मुश्ताक बशीर शेख याला देण्यात आले. या कामाचा 6 ऑगस्ट 2024 रोजी करारनामा करण्यात आला. या करारामध्ये एकुण 1 ते 30 अटी व शर्ती नमुद करण्यात आल्या. तो कामगारांकडुन गटारी साफ करू लागला. तो गुरुवार दि.10 जुलै 2025 रोजी दुपारी 4 वाजता आरोग्य विभागाची परवानगी न घेता. कोल्हेवाडी रोडवर पाबळे वस्तीकडे जाणाऱ्या कॉर्नर जवळील बंदिस्त गटार साफ सफाईचे काम करण्यास सुरुवात केली. त्यामुळे, ठेकेदाराने करारनाम्यातील अट क्र.2 चे उल्लंघन करून कामाला सुरुवात केली. ठेकेदाराने मजुर यांची दक्षता न घेता करारनाम्यातील अट क्र.6 चे उल्लंघन करून आरोग्य विभागाची पूर्वपरवानगीशिवाय गटारीवरील चेंबरचेसाफ सफाई करण्यात सुरवात केली.

           

दरम्यान, ठेकेदाराने मजुरांची काळजी घेतली नाही. हातात मौजे, गमबुट, मास्क, चष्मा, कॅप ऍप्रन, गटार साफ करण्यासाठी सक्शन मशीनचा वापर केला नाही. हे सर्व नसताना अतुल पवार या तरुणाला बंदीस्त गटार साफ करण्यासाठी खाली उतरवण्यात आले. जेव्हा मजुर जखमी झाल्याचे कळले. तेव्हा घटनास्थळी धाव घेतली असता दोन तरुण मुलं हे अत्यावस्थेत गटारीत पडलेले होते. तेथील स्थानिक नागरिक व जेसीबीच्या सहाय्याने या दोन तरुणांना बाहेर काढुन उपचारासाठी खाजगी रुग्णालयात दाखल केले. मात्र, तो पर्यंत फार उशीर झाला होता. या घटनेत अतुल रामनाथ पवार (रा. संजयगांधी नगर, ता. संगमनेर), रियाज जावेद पिंजारी (रा. मदिनानगर, ता. संगमनेर) यांचा मृत्यु झाला. या दोन तरुणांच्या मृत्यूला ठेकेदार जबाबदार असल्याने नगरपालिकेचे स्वछता निरीक्षक अमजद पठाण यांनी  शहर पोलीस ठाण्यात गुन्हा दाखल केला. यावरून आरोपी रामहरी मोहन कातोरे, निखील रामहरी कातोरे (रा. गोविंदनगर, ता. संगमनेर), मुश्ताक बशीर शेख (रा. शिवाजीनगर, ता. संगमनेर) यांच्यावर गंभीर कलमान्वये संगमनेर शहर पोलीस ठाण्यात गुन्हा दाखल करण्यात आला आहे. याचा पुढील तपास पोलीस करत आहे.