संगमनेरच्या निमगाव जाळीत हॉटेलवर दरोडा, कटावणी डोक्यात टाकून दारु पळविली, सिने स्टाईलने चौघे अटक
सार्वभौम (संगमनेर) :
संगमनेर तालुक्यातील निमगाव जाळी येथे नऊ दरोडेखोरांनी एका हॉटेलच्या गोडावुनमध्ये दरोडा टाकल्याची धक्कादायक घटना सोमवार दि. 13 जुलै रोजी रात्री 12 वाजण्याच्या सुमारास घडली. यात हॉटेलच्या खिडकी तोडून आतील दरवाज्याचे कुलूप तोडून एकास कटावणीने मारहण केली. तर तेथील बिअरचे बॉक्ससह 3 हजार 840 रुपयांचा मुद्देमाल चोरुन नेला. याप्रकरणी आश्वी पोलीस ठाण्यात गुन्हा दाखल करण्यात आला आहे. यानंतर पोलिसांनी यातील चार दरोडेखोरांना अटक केली असून पाच जणांचा शोध सुरू आहे.
याबाबत सविस्तर माहिती अशी की, सोमवारी रात्री निमगाव जाळी येथील गोविंद गार्डनच्या मागे एका गोडावुनमध्ये काही दारुचा साठा ठेवला होता. यावेळी रात्री श्रीरामपूर येथील दरोडेखोर आले व त्यांनी येथील दारु लंपास करण्याचा प्रयत्न केला. यावेळी खिडकी व दरवाज्याचे कुलूप तोडून त्यांनी आत प्रवेश केला. त्यांना तेथे काही रोख मुद्देमाल मिळाला नाही. मात्र, गोडावुनमध्ये जी दारू होती. ती मात्र त्यांनी घेऊन तेथून पोबारा करण्याचा प्रयत्न केला. यांना तेथील एका व्यक्तीने विरोध केला असता त्याच्या डोक्यात यांना कटावणी मारत गंभीर जखमी केले व नऊ जणांना तेथून पोबारा केला. दरम्यान तेथे आरडाओरड झाली असता हे सर्व अस्तव्यस्त दिशेने पळून गेले.
तर महत्वाचे म्हणजे गुरूवार दि. 9 जुलै रोजी रात्री 10 वाजण्याच्या सुमारास तळेगाव दिघे येथे अज्ञात चोरट्यांनी प्रकाश बबन महाले यांच्या परमिट रुम व बारच्या हॉटेलचे शटर तोडून आत प्रवेश केला होता. तब्बल 44 हजार 845 हजार रुपयांचे मुद्देमाल लंपास केला होता. याबाबत पोलिसांनी चोरीचा गुन्हा दाखल केला आहे. मात्र, हा देखील दरोडा तर नाही ना? असा प्रश्न उपस्थित केला जाऊ लागला आहे. यात चोरटे अज्ञात आहेत तर या घटनेनंतर लगेच चार दिवसात याच परिसरात अशा प्रकारे हॉटेलवर दरोडा पडतो. ही काहीशी संशयास्पद गोष्ट आहे. आता त्या दृष्टीने पोलीस तपास करीत आहेत.
