एका बुक्कीत त्याने तिचा दात पाडला, सात जणांवर गुन्हा दाखल संगमनेर तालुक्यातील घटना!
सार्वभौम (संगमनेर) :
संगमनेर तालुक्यातील दरेवाडी शिवारात शेतात काम करणार्या महिलेचा एका बुक्कीत दात पाडल्याची धक्कादायक घटना मंगळवार दि. 16 जून रोजी सकाळी 9 वाजण्याच्या सुमारास घडली. यात सुनिता मच्छिंद्र दरगुडे ही महिला जखमी झाली असून याप्रकरणी घारगाव पोलीस ठाण्यात सात जणांवर गुन्हा दाखल करण्यात आला आहे. दत्तु शंकर नागरे, लक्ष्मण शंकर नागरे, अनिल लक्ष्मण नागरे, महेश दत्तु नागरे, अलका नागरे, शैला नागरे, संगिता नागरे (सर्व रा. दरेवाडी, ता. संगमनेर) यांची फिर्यादीत नावे आहेत.
याबाबत सविस्तर माहिती अशी की, सुनिता दरगुडे या महिलेच्या भावाने दरेवाडी शिवारात टॉमेटोचे पिक वाट्याने केले आहे. त्याला खत घालण्यासाठी या ताई शेतात गेल्या होत्या. त्यावेळी संबंधित आरोपीत व्यक्ती तेथे आले. त्यांनी या महिलेस आरेरावी करत दमबाजी करण्यास सुरूवात केली. तु आमच्या शेतात यायचे नाही. असे म्हणत दोघांमध्ये बाचाबाचीला सुरूवात झाली. त्यावेळी तिला शिवीगाळ करीत मारहाण करण्यात आली. यावेळी महेश दत्तु नागरे यांनी जखमी महिलेस अशी एकच बुक्की मारली की, तिचा खालचा एक दातच पडला. त्यावेळी त्या रक्तभंबाळ झाल्या.
