दामदुप्पटच्या नादी लागून 10 लाख 12 हजार गेले, मैत्री करुन विश्वासघात केला, गुन्हा दाखल..
सार्वभौम (संगमनेर) :
दाम दुप्पट फायदा करुन देतो असे सांगत चिखलीच्या एका तरुणाने मालदड रोड येथील एका व्यक्तीची फसवणूक केल्याचा धक्कादायक प्रकार समोर आला आहे. यात 10 लाख 12 हजार 500 रुपये घेऊन विश्वासघात केल्याचे म्हटले आहे. ही घटना दि. 11 ऑगस्ट 2017 ते दि. 8 सप्टेंबर 2017 या कालावधीत घडली आहे. याप्रकरणी सचिन माधवराव कानवडे (रा. मालदड रोड, ता. संगमनेर) यांच्या फिर्यादीनुसार संगमनेर पोलीस ठाण्यात गुन्हा दाखल करण्यात आला आहे. तर नितीन साहेबराव हासे (रा. चिखली, ता. संगमनेर) असे आरोपीचे नाव आहे.
दरम्यान 2017 ते आजवर कानवडे यांनी हासे यास फायदा अणि मुद्दल याबाबत वारंवार विचारपूस केली. दरम्यानच्या काळात त्यांच्यात काही व्यवहार झाला. मात्र, त्यातून कानवडे यांचे यांचे समाधान झाले नाही. दिलेली रक्कम हकनाक गुंतून बसली, फायदा नाही तर तोटाच होऊन बसल्याचे त्यांच्या लक्षात आले त्यानंतर त्यांनी हासेकडे पैशाची मागणी केली असता त्याने उत्तरे देण्यास टाळाटाळ सुरु केली. हे खेळ तब्बल तीन वर्षे सुरू होता. मात्र, कानकाटे यांना योग्य मोबदला मिळाला नाही.
अशा घटना वारंवार घडत असतात, त्यामुळे जेव्हा पैसा गुंतवणूक करायची असेल तेव्हा योग्य मार्गदर्शन घेणे आवश्यक आहे. दाम दुप्पट आणि हव्यासापोटी गुंतवलेली मुद्दल देखील निघून जाते. त्यामुळे, व्यापारी आणि नोकरदार यांनी अशा प्रकारची खाजगी गुंतवणूक करताना विचार केला पाहिजे. अशी प्रतिक्रिया पोलीस प्रशासनाने दिली आहे.
