"मुख्यमंत्री दौरा" म्हणजे "झिरो बजेटचा क्रुत्रीम विकास" सगळ्यांची "पळापळ"..!

अकोले/संगमनेर :-
जनतेकडून मुख्यमंत्र्यांच्या "महाजनादेश" यात्रेचे "कौतुक" काही औरच होऊ लागले आहे. कारण, कधी नव्हे, पण "बरगडी ढिल्ली" करणारे रस्ते आता थिगळं दिल्याने "प्लेन" दिसू लागले आहेत. झाडा-झुडपांची तोड होऊ लागली आहे. रस्त्यात "वाकलेले विजेचे खांब" ताठ उभा राहिले आहेत. तर अगदी 'बैलगाडीला' लागणाऱ्या "वीजतारा" उंच-उंच गेल्या आहेत. इतकेच काय, रस्त्यांची सफाई होऊन "तालुका स्वच्छ" असल्याचा "कांगावा" स्थानिक लोकप्रतिनिधींची यंत्रणा करताना दिसत आहेत. त्यामुळे या यात्रेला तात्पुरता "क्रुत्रीम विकास" असे म्हटले असते तर वावघे काय ? असा प्रश्न "जनतेला" पडला आहे. कारण, जे काही चालु आहे. ते निव्वळ "शोभा वाढविण्यासाठी" आहे. त्याचा कोणताही फायदा जनतेला नाही. त्यामुळे "स्वत:ची काळजी" घेण्यासाठी सरकार किती "यंत्रणा वेठीस" धरते. मात्र, "खड्ड्यांनी" कोणाचा बळी गेला तरी सरकार सुस्थ झोपतं. त्यामुळे "आपलं ते पोरगं आणि लोकाचं ते कारट" अशीच भुमिका सरकारने घेतल्याचे जनतेला वाटते आहे. खरे पाहता कालवर जनता रस्त्यांची डागडूजी मागत होती. पण, निधी नाही असे म्हणून टोलवा-टोलवी झाली. आज मुख्यमंत्री येणार तर कोठून आला यांच्याकडे निधी, प्रशासनाने कोठे दरोडा टाकला का ? कोठून केली निधीची फिरवा-फिरवा हा सर्व "झिरो बजेटचा क्रुत्रीम विकास" आहे. अशी टिका मतदारांकडून होत आहे. त्यामुळे उद्याचे सरकार कोणाचे हे जनतेतील "सुप्त लाटच" ठरविणार आहे. असे जाणकारांना वाटते.

गेले ते दिवस राहिल्या त्या आठवणी !

गेली ५० वर्षे अकोले तालुक्यात अजूनही "मुलभूत सुविधा" दुर्गम आदिवासी समाजापर्यंत पोहचली नाही. याला कारण कोण ? हे शोधण्यासाठी "साहेबांच्या अध्यक्षतेखाली" एक समितीच नेमली पाहिजे. गेल्या "पाच वर्षात भाजप सरकारमुळे विकास खुंटला" असे जर कोणाला वाटत असेल तर ते आम्हालाही मान्य आहे. मात्र, "४० वर्षे" कोणामुळे विकासाची "प्रगती खुंटली" या प्रश्नाचे उत्तर कोणीच कसे द्यायला समोर येत नाही. ज्यांनी आजवर "विरोधी भुमिका" बजावली त्यांनी "हातमिळवणी" केली आणि खऱ्या अर्थाने "जनतेची दिशाभूल" केली. नाहीतर "१९९५" वगळता पिचड साहेबांना अकोल्याने एकदाही "लिड" दिले नाही. जनतेला "पक्षबदल" नको आहे. "परिवर्तन" पाहिजे आहे ते प्रतिनिधीत्वामध्ये" असे सरळ-सरळ जनतेला वाटते. पण, आजवर "कुंपनच शेत खातय" हे जनता ओळखून चुकली आहे. म्हणून आता फक्त "डॉ. लहामटे" याच्यावर जनतेने 'विश्वास' टाकल्याचे "सोशल मीडियातून" पहावयास मिळत आहे.

विकास हा तर एक बहाना, लाल दिवा हाच खरा निशाना !

आज "महाजनादेश" यात्रेत मुख्यमंत्री "संगमनेर, अकोले, राहुरी" या तालुक्यांच्या विकासाला कोट्यावधी रुपये देण्याचे आमिष दाखवितात. पण, नगर शहरात राष्ट्रवादीच्या "संग्राम जगताप" यांनी शहर "विकासासाठी भाजपला ३०० कोटी" च्या मुद्द्यावर पाठींबा दिला. त्या फडणवीस सरकारचे "कुठय ३०० कोटी" ! या प्रश्नाचे उत्तर शोधून सापडेनासे झाले आहे. इतकेच काय, गेल्या पाच महिन्यापुर्वी "चंद्रकांत दादा पाटील" यानी संगमनेर-अकोले- घोटी या महामार्गाच्या कामांचे उद्धाटन केले होते. त्याचे काय झाले ? "इतके कोटी देऊ, तितके कोटी" मंजूर, पण "एक रुपया" खाली यायला तयार नाही. हे जनतेला दिसते आहे. मात्र, "सरकारला" मते कोण देत आहे. याचे उत्तर मतदारासह "ईडीत" अडकलेल्या "कोहिनुर" हिऱ्यास देखील सापडले नाही. मात्र, ते 'उत्तर' सापडायला गेले आणि "इडीच्याच तावडीत सापडले".

"अश्वासनांची पाटीलकी"

अर्थात जनतेच्या हाती "धुपाटनं" सोडून काहीच येणार नाही. असेच दिसते आहे. पण काही झालं तरी "राष्ट्रपती, पंतप्रधान, मुख्यमंत्री", यांचे दौरे प्रत्येक तालुक्यात झाले पाहिजे. किमान "निधी नाही" तर त्यांच्या "स्वागता" साठी प्रशासन व आमदार "घर घालून धंदे" का होईना ! पण रस्त्यांना "थिगळे" तरी देतात. याचा फायदा हाच की; "तुळशीमुळे धोत्र्यावर पाणी" तरी पडते. जनतेला तात्पुरता "खड्डेमुक्त रस्ता" उपभोगण्यास मिळतो. हाच "मंत्रीमोहदय" येण्याचा तात्पुरता आनंद. नाहीतर "रस्त्याच्या दुरावस्थेने महिलेची प्रसुती" या "बातम्या पुरातन काळाच्या नाहीत" तर "अधुनिक काळातील" पेपरांना छापून आल्याचे आपण वाचले आहे. आता २४ तारखेनंतर विकासाला खऱ्या अर्थाने सुरूवात होणार असल्याचे साहेबानी सांगितले आहे. त्यामुळे खरच "खड्डे दाखवा आणि पैसे कमवा" हा चंद्रकांत पाटलांचा उपक्रम अकोल्यात सुरू होईल अशी जनतेला आशा वाटते आहे. अर्थात असे झाले तर "सरकारचे आभार आणि नाहीच झाले तर अकोल्यात रोजगार" असे म्हटल्यास काही वावघे ठरणार नाही.

येणार साहेब माझा...! "श्रमदान"

खरे पाहता "मुख्यमंत्री" येणार तर एकीकडे "लाखो रुपयांची उधळपट्टी" दोन आडिच तासांसाठी सुरू आहे. तर दुसकडे "अडिच लाख" पुरग्रस्तांन 'राहण्यासाठी घरे नाही'. आणि तिसरीकेड मंत्रीमोहदय हजारो क्षमतेचा ठेकेदारी नागपुरी मंडप घेऊन गावोगावी फिरत आहेत. हे सर्व "अनाकलनिय" आहे. इतकेच काय ! ज्या वैभव पिचड साहेबांनी राष्ट्रवादीत असताना रस्त्यासाठी आंदोलन उभारले होते. तरी प्रशासनाला जाग आली नाही. शेवटी अकोल्यातील "सामाजिक संस्थांनी" पुढाकार घेऊन "अकोले-संगमनेर" रस्त्यांची डागडुजी केली. आज हेच "शासन-प्रशासन बीन बोभाट" खड्डे बुजविण्यासाठी अविरत धडपड करताना दिसत आहे.

बलिदान करू, तारा उंच उंच चढवू

असो..! ईव्हीएम, ईडी, पक्षांतर, निष्ठा, पक्ष, यात्रा या सर्वांशी अकोलेकरांना घेणेदेणे नाही. उद्याच्या काळात कोणीही आमदार होवो. खरोखर अकोल्याचा विकास होवो, राेजगार, शिक्षण, मुलभूत गरजा, पाणी, शेतमालाचा भाव, पर्यटन, रस्ते, दळणवळण, बाजारपेठ अशा अनेक समस्या सुटोत असेच जनतेला वाटते आहे.

=====================

-- सुशांत पावसे

(संगमनेर प्रतिनिधी)

=====================

-- सागर शिंदे

------------------------ -----------------------------------
जाहिर आभार
----------------------------------

प्रिय मित्रांनो सार्वभाैम या पोर्टलने ३८ दिवसात ७३ बातम्यांच्या जोरावर ४ लाख २५ हजार वाचक पुर्ण केले आहेत. हे इतक्या वेगाने लोकप्रिय होणारे पहिलेच पोर्टल आहे. याची गुगलने दखल घेतली आहे. हे सर्व श्रेय्य तुम्हा वाचकांना जाते. माझा कोठेही नंबर नाही, ग्रुप नाही. पण, निव्वळ निस्वार्थी व निर्भीड शब्दांमुळे आपण ही लिंक शेअर करता. हे यश तुम्हा सर्वांचे आहे.

---धन्यवाद ---

आपला

-------------------------------------------