बाधकाम अधिकाऱ्यावर ACB चा छापा, 19 हजारांची लाच घेताना रंगेहात ठोकल्या बेड्या, सहकारीही जाळ्यात.!

 

सार्वभौम(संगमनेर): संगमनेर तालुक्यातील पंचायत समिती मध्ये  ठेकेदाराकडुन शाखा अभियंता यांनी 19 हजार रुपयांची लाच घेतल्याचा खळबळजनक प्रकार आज सोमवार दि. 23 मे 2022 रोजी दुपारी 2 वाजण्याच्या सुमारास घडला. यात संजय गोविंदराव ढवण (रा. श्रीरामपुर शहर) याना नाशिक लाचलुचपत विभागाने बेड्या ठोकल्या आहेत. लाचखोर संजय ढवण यांनी ही रक्कम स्वीकारली असता त्यांस रंगेहात पकडण्यात आले. त्यांना लाचलुचपत नाशिक विभागाने ताब्यात घेतले असुन त्यांची संपत्ती, बँक खाते, घरझडती यासाठी पुढील प्रक्रिया सुरू केली आहे.या प्रकरणात संगमनेरातील आणखी एका अधिकाऱ्याचे नाव पुढे येत असुन याबाबत शहानिशा करण्याचे काम चालु आहे अशी माहिती लाचलुचपत विभागाच्या अधिकाऱ्यांनी दिली. यात संगमनेर शहरात गुन्हा दाखल करण्याची प्रक्रिया सुरू केली आहे. तर  पोलीस अधीक्षक संजय कडासने यांच्या मार्गदर्शनाखाली नाशिक लाचलुचपत विभागाच्या पथकाने ही धडाकेबाज कारवाई केली आहे. काही दिवसांपूर्वी तहसील कार्यलयातील लाचखोर लिपीकास चार वर्षांची शिक्षा लागली तरी देखील संगमनेरात लाच घेण्याचे प्रमाण कमी होताना दिसत नाही.

           याबाबत सविस्तर माहिती अशी की, चिंचवली गुरव येथे एका ठेकेदाराने काम घेतले होते. ठेकेदाराने कामाला लागणारी सर्व प्रक्रिया केली. त्याची परवानगी व कामाची पाहणीसाठी लाचखोर शाखा अभियंता संजय ढवण यांनी कामात वारंवार टाळाटाळ केली. त्यांनी परवानगी मिळण्यासाठी व पाहणीसाठी ठेकेदाराकडे  5% कमिशनने 15 हजार तर क्वालिटी कंट्रोल अधिकाऱ्यांचे 4% कमिशनने 4 हजार असे 19 हजार रुपयांची मागणी केली. मात्र, ठेकेदार म्हणाले चिंचवली गुरव मध्ये जे काम करायचे आहे त्याचे सर्व डिपॉजित भरले आहे. काम पूर्णत्वास नेले आहे. त्यात पैसे कशासाठी द्यायचे? मात्र, शाखा अभियंता ऐकतील ते कसले? त्यांनी तक्रारदाराकडे 19 हजार रुपयांची मागणी केली. मात्र, तक्रारदार यांच्या वारंवार मागणीला वैतागल्याने त्यांनी थेट नाशिक लाचलुचपत विभागाकडे तक्रार केली. त्यानंतर, नाशिकचे पथक आज दुपारी थेट संगमनेरात दाखल झाले.

            दरम्यान, तक्रादार हे त्यांच्या मतावर ठाम होते. त्यामुळे, नाशिक लाचलुचपत विभागाने थेट पंचायत समिती मध्ये सापळा रचला. तक्रारदाराकडुन शाखा अभियंता संजय ढवण यांनी तक्रारदाराकडे 19 हजार रुपये घेत असल्याचे लाचलुचपत विभागाने रंगेहात पकडले. आज दुपारी सखोल चौकशी सुरू होती. यात आणखी कोण आहेत का? यांनी यापूर्वी कोणाकडे अशी मागणीकेली आहे का? यांच्या घरात तसेच बँकेत किती मालमत्ता आहे. आशा प्रकारची पुढील कारवाई सुरू आहे.

            दरम्यान, संगमनेर तालुक्यात किती भ्रष्टाचार बोकाळला आहे याची प्रचिती येऊ लागली आहे. इथे नित्कृष्ट दर्जाचे कामकरून कोट्यावधीचा भ्रष्टाचारा होत असल्याचे पाहायला मिळते. आता तर रस्त्याच्या कामाला खडी, मुरूम न टाकता मातीवरच डांबर टाखल्याचे पाहायला मिळाले. याचा व्हिडीओ देखील व्हायरल झाला. याची तक्रार देखील केली आहे. पण, तक्रारीची दखल घेतली ते अधिकारी कसले? त्यांचे हात जर मलिद्याने बरबटलेले असले तर ते काय कारवाई करणार असा प्रश्न संगमनेरातील सुज्ञ लोकांना पडला आहे. इथे कोट्यावधीचे विकास काम होत असले तर भ्रष्टाचार किती होतो हे न बोलले बर! त्यामुळे, येथे प्रत्येक शासकीय कार्यलयात भ्रष्टाचार होत असल्याची चर्चा संगमनेरातील सामाजिक कार्यकर्ते करत आहे. अगदी पोलीस खात्यात अधिकाऱ्यांपासुन ते कर्मचाऱ्यांपर्यंत  छापे मारल्याचे संगमनेरात पाहायला मिळाले. येथील हप्तेखोरीची अनेकदा अधिकाऱ्यांकडे तक्रारी झाल्याचे पाहायला मिळत आहे. इतकेच काय! सर्कल पासुन ते तलाठी यांच्यावर कित्येकवेळा ट्रॅप होताना दिसत आहे. त्यामुळे, या वर्षी लाचखोरीत संगमनेर तालुका जिल्ह्यात अव्वल असल्याचे बोले जाते.